Hulyo 27, 2006

Governor Yebes wala mahimoot samtang SP mohimo ug imbestigasyon
ZN DepEd mihimaraot paglimbong sa mga atleta sa palarong pambansa

Nakadaug man sa gihimong national competition atol sa Palarong Pam-bansa didto sa Naga City ang mga atleta nga nagagikan sa Zamboanga del Norte sa duolang Baseball apan dako usab ang kaulawon nga nasinati sa mga kadagkoan sa Departamento sa Edukas-yon ug mga opisyales sa probinsya tapos mabulgar nga ang edad sa mga batang magdudula ang gipangpiki.

Dr. Sharif Adzhar H. Sarahadil, Provincial Schools Division Superintendent nakasaway pag-ayo sa gikatahong pagbaylo sa mga batang magdudula sa Palarong Pambansa gikan sa Sindangan Pilot Demonstration School sa lungsod sa Sindangan ug ang maong buhat iyang gihimaraot.

Sa ilang sulat katin-awan, ang buhatan sa edukasyon ilabi na ang Zamboanga del Norte Schools Division nanghimaraot sa gikatahong pagpanglimbong nga gihimo sa usa sa mga magtutudlo sa maong dibisyon. “Sa kanunay kami nagtinguha nga magbaton sa tumang kaligdong ug ampingan ang dungog sa among katungdanan.

Ang tigbansay nga magtutudlo gikan sa Sindangan Central District nga mihimo sa maong salawayong buhat sa pagpanglimbong sa edad sa mga magdudula, usa ka bag-ong magtutudlo kinsa gustong mopakita’g gilas sa dibisyon aron mabalhin gikan sa iyang bukid nga estasyon ngadto sa haduol nga dapit.

Sa wala pa mogawas ang balita sa nasudnong telivision, aduna nay mga hulongihong nga miabot sa buhatan sa dibisyon ug gihimo gilayon ang pagsusi. Miangkon ang magtutudlo sa iyang sala ug kini nangayo ug pasaylo. “Gibati siyag kasubo nga misanong siya sa tambag sa usa ka karaan nga coach nga dili taga dinhi nga himoon ang pagpanglimbong aron modaug sa Palarong Pambansa tungod kay sumala sa namatikdan ang modula didto kadto nang mga dagku ug edaran.

Buot ipahibalo sa DepEd Zamboanga del Norte Division nga ang provincial ug regional athletic meets gipahigayon sa tinarong ug ligdong nga paagi uban sa higpit nga pagsusi sa mga magdudula. Ang limbong nahitabo sa dihang midaug ug ipadala na ang mga magdudula sa Palarong Pambansa.

“Wala kami malipay sa nahitabo ug kini among gipanghimaraot. Among giduso ngadto sa Regional Director sa buhatan sa edukasyon ang pagpahamtang ug tukmang silot sa hingtungdan.”

“Sa pagkakaron kini among gitutukan aron masubli ang maong kasaypanan ugma damlag. Kini naghatag ug tamdanan alang sa tanan nga bisan unsang kahiwian sa silot pagabugtian,”panapos nga pamahayag sa DepEd Zamboanga del Norte Division.

Wala mahimuot si Governor Rolando E. Yebes sa nadiskobreyhang anomaliya sa pagsalmot sa mga kabataan atol sa Palarong Pambansa kansang magdudula gikan sa rehiyon nuybe nga nanglimbong diin ang nalambigit nga mga atleta nagagikan sa Sindangan Pilot Demonstration School sa lungsod sa Sindangan.

Gipahayag ni Governor Yebes nga tungod sa hitabo, makigtagbo siya sa tanang mga kadagkoan sa Department of Education-Zamboanga del Norte Division nga gipangulohan ni Schools Division Supt. Dr. Sharif Adhzar Sarahadil tungod kay makaulaw kini sa probinsya.

Matud sa gobernador, kinahanglan adunay opisyal nga pagpasabot ang DepEd mahitungod sa maong isyu. Nahimong sayang ang gasto pagsuporta sa maong sports activities diin nahitabo ang anomaliya nga dili unta angayan buhaton.

Iyang gisugyot nga ang Sanguniang Panlalawigan mopahigayon ug linain nga imbestigasyon aron malikayan ug mapugngan ang sama sa nahitabo karong tuiga diha sa pagsalmot sa Palarong Pambansa. Usa dakong opisyal sa DepEd namahayag nga miagi sa makuting screening ang mga atleta nga mosalmot sa maong sports competition, apan dako nalang katingala kun ngano nakalusot ang maong matang sa pagpanglimbong.

Gibutyag sa maong opisyal nga pila na ka tuig ang milabay adunay usa ka delegasyon nga misalmot sa provincial meet ang nasakpan nga namintaha pinaagi sa pagpadula ug mga over-age nga magdudula. City Councilor Ricky Mejorada nagkanayon nga kinahanglan hatagan ug pagtagad ang maong isyu tungod kay makahatag kini ug maot nga imahe sa Zamboanga del Norte. Dako ang iyang pagtuo nga dili kini binuhatan sa kinatibuk-ang dibisyon kon dili, pipila lamang ang nagmaniubra sa maong pag-pamintaha sa pagsalmot sa Palarong Pambansa. Alang kang Mejorada, kinahanglan dunay silot ipahamtang ngadto sa nalambigit sa maong pagpanglimbong. (The New Nandau, Vol. XV No. 3)

*

 Poverty Reduction Initiatives ni Yebes gidayeg ni PGMA

Mi-ani ug pagdayeg gikan kang Presidente Gloria Macapagal Arroyo ang programang Poverty Reduction Initiatives ni Governor Lando Yebes dinhi sa probinsiya. Kini gipabati sa Pangulo atol sa Joint Cabinet and Regional Development Council Meeting didto sa Peoples Palace sa dakbayan sa Cotabato karong bag-o nga gitambongan sa Gobernador ning lalawigan isip maoy Chairman sa Regional Development Council dinhi sa rehiyon 9.

Sa iyang pahayag gibutyag ni Gov. Yebes nga nakadayeg ug daku ang pangulo sa nasud gumikan sa maong inisyatibo nga pagpakunhod sa tumang kawad-on sa mga katawhan nga gihimo sa Gobernador sa iyang administrasyon karon.

Kahinumduman nga ang administrasyuon ni Gov. Lando Yebes mi-adaptar sa prinsipyo sa panggobyerno nga UNA SA TANAN ANG KATAWHAN, kini mao ang paghatag sa tanang ayuda nga nahimo sa pangagamhanang probinsiyal ngadto sa mga naglisod nga mga katawhan dinhi sa atong probinsiya.

Ang Community Development Assitance Unit kon CDAU nga gidumala ni CDAU Unit Head Roney Pacilan mao ang gitahasan sa pagpadahili sa mga nagkadaiyang ayuda sa kagamhanan ngadto sa mga angayang tabangang  katawhan  sa mga lagyong kabarangayan nga sakop ning lalawigan pinaagi sa Lando Bibo, ang Barangay Indigent Beneficiaries Organization.

Ang Poverty Reduction Initiatives ilawom sa Lando Bibo nga gidumala sa CDAU naghatag sa mga programa nga naglantaw sa pagpaalibyo sa kawad-on sa mga pobreng katawhan pinaagi sa panginabuhi-an paghatag ug mga similya sa nagkadaiyang matang sa tanom, pagbuhi ug mga similya sa isdang tilapya sa mga kasubaan ug kasapaan, paghatag ug libreng hospitalisasyon pinaagi sa PHCAP kon Provincial Health Care Assistance Program, pagpatungha sa daghanang mga estudyante ilawom sa Provinvial Scholar Program, pagpang-apod apod sa mga nagkadaiyang Assistive Devices ngadto sa mga katawhan nga adunay kabilinggan sa panglawas ug uban pang ayuda sa pangagamhanang probinsiyal para sa mga katawhan.

Si pangulong Arroyo namahayag nga usa ka maanindot nga programa ang gihimo ni Gov. Yebes kinsa prayoridad ang pagpaalibyo sa kahimtang sa mga pobreng katawhan.

Hangtud karon ang programang Lando Bibo padayong mingsom-ok sa mga lagyong kabarangayan ning lalawigan pagpaabot sa serbisyo ug ayuda sa katawhan gikan sa pangagamhang probinsiyal. (Mindanao Star, Vol.II No.26)

*

Pamahayag sa Buhatan sa Edukasyon:
SA GIKATAHONG PAG-BAYLO SA MGA BATANG MAGDUDULA SA PALARONG PAMBANSA GIKAN SA LUNGSOD SA SINDANGAN PINAAGI NI DR. SHARIF ADZHAR H. SARAHADIL, PROVINCIAL SCHOOLS DIV. SUPERINTENDENT

“Ang buhatan sa edukasyon ilabina ang dibisyon sa Zamboanga del Norte nanghimara-ot sa gikatahong pagpanglimbong nga gihimo sa usa sa mga magtutudlo ning maong dibisyon. Sa kanunay kami nagtinguha nga magbaton sa tumang kaligdong ug ampingan ang dungog sa among katungdanan.

“Ang tigbansay nga magtutudlo (coach) gikan sa Sindangan Central District nga mihimo sa salawayong buhat sa pagpanglimbong sa edad sa mga magdudula, usa ka bag-ong magtutudlo kinsa gustong mopakita’g gilas sa dibisyon aron mabalhin gikan sa iyang bukid nga estasyon ngadto sa haduol nga dapit. “Sa wala pa kini mogawas sa nasudnong telebisyon, aduna nay mga hungihong nga miabot sa buhatan sa dibisyon ug gihimo dayon ang pag-susi. Miangkon ang magtutudlo sa iyang sala ug nangayo siya’g pasaylo. Gibati siya’g kasubo nga misanong siya sa tambag sa usa ka karaan nga coach nga dili taga dinhi nga himoon ang pagpanglimbong aron modaug sa Palarong Pambansa tungod kay sumala sa namatikdan ang modula didto kadto nang mga dagku ug edaran.

“Buot namong ipahibalo ngadto sa tanan nga ang provincial ug regional athletic meets gipahigayong sa tinarong ug ligdong nga paagi uban sa higpit nga pagsusi sa mga magdudula.  Ang limbong nahitabo sa dihang midaug ug ipadala na ang mga magdudula alang sa Palarong Pambansa. “Wala kami malipay sa nahitabo ug kini among gipanghimara-ot. Among giduso ngadto sa Regional Director sa buhatan sa edukasyon ang pagpahamtang sa tukmang silot sa hingtungdan.

“Sa pagkakaron, kini among gitutokan aron dili masubli ang maong kasaypanan ugma damlag. Kini naghatag ug tamdanan alang sa tanan nga bisan unsang kahiwi-an sa silot pakabugti-an. “Daghang Salamat.” (Dipolog Chronicle, Vol.VI No.3)

*

Sa labing unang higayon sulod sa dugay-dugay nang panahon, duha ka mga dagkong pangpasahero nga eroplanong Jet dungang miparada sa Dipolog airport Huwebes sa hapon, ang abyon sa Cebu Pacific ug sa PAL.

Ang okasyon maoy unang higayon sa pagserbisyo sa Cebu Pacific dinhi sa Dipolog samtang ang PAL daan na man dinhi. Gisugat sa kalipay sa mga opisyales ning dakbayan sa Dipolog pinangulohan ni Mayor Roberto Y. Uy ug ni Unang Ginang Evelyn T. Uy, ang City Tourism chairperson sa siyudad, alang sa unang pagtugpa sa abyon nga iyaha sa Cebu Pacific.

Uban pang mga opisyales sa dakbayan nga mitagbo mao sila si Vice Mayor Senen O. Angeles, mga konsehales nga sila si Ricky Mejorada, Alton Ratificar, Horacio Velasco ug lakip na ni City Administrator Romy Reyes ug City Information Officer Lorenzo “NSOI” Aseniero. Nahuot sa mga katawhan ang Dipolog Airport human gipahibalo ang maiden flight sa maong abyon sa miaging Huwebes, Hulyo 13.

Sakay niini ang mga kadagkuan sa Cebu Pacific uban kanila ni Charles Lim, PR-consultant; Candice A. Iyog, Marketing Director; Charlie Palpalatoc, Organizational Communication Director ug uban pa gikan sa kaulohang Manila aron sa  pagtambong sa gihimong pagsubo niini. Giabi-abi ni Mayor ug Unang Ginang Uy uban sa mga opisyales ning dakbayan ang mga kadagkuan sa Cebu Pacific atol sa hamubong programa nga gihan-ay didto sa Dipolog Airport.

Gipahayag ni Mayor Uy ngadto sa mga kadagkuan sa Cebu Pacific sa paghatag ug dugang abyon nga magbiyahe Dipolog-Manila alang sa mga katawhan ning dakbayan ug dili lang ang dakbayan sa Dipolog ang mahimong maserbisyohan kondili lakip na niini ang mga sikbit nga lalawigan sa Misanis Occidental, Zamboanga del Sur, Zamboanga Sibuguey ug ang lalawigan sa Zamboanga del Norte.

Matud pa ni Mayor Uy nga sa pagkakaron daghan ang nahimong matabangan ang Cebu Pacific sa atong dapit tungod sa pagkonhod sa pletihan niini. Kini gilauman nga magpabilin ang Cebu Pacific sa ilang suporta para sa mga Dipolognons. Subay niini nagpasalamat usab ang mga kadagkoan sa Cebu Pacific kinsa mianhi dinhi human sila gipadala ni Lance Gokongwie (ang chief executive officer), sa mga opisyales sa siyudad sa Dipolog ubos sa pagpangulo ni Mayor Uy kinsa  dako usab nga nahimong suporta ngadto sa Cebu Pacific.

Nahidangat usab didto sa Dipolog City Airport maong adlaw sila si Governor Rolando Yebes ug Cong. Ceasar Jalosjos sa 3rd Congressional District ning lalawigan. Sila naglaum nga adunay nay dakong kalambuan ang lalawigan sa Zamboanga del Norte tungod kay adunay nay laing abyon nga maoy masakyan sa mga turista kinsa gusto molantaw sa mga tourist spots dinhi sa lalawigan. (Dipolog Chronicle, Vol.VI No.3)

*

Sangguniang Bayan sa Gutalac nagkasinabot ra gyud

Gipahibawo ni Board Member Felormino Cabale sa lungsod sa Gutalac, Zamboanga del Norte nga naka jamming na sila karon sa ilang Sangguniang Bayan uban ni Vice Mayor Rosita Dalogdog.

Kini ang gibutyag ni Board Member Cabale nga meyembro usab sa Sangguniang Bayan sa Gutalac, atubangan sa pagduha-duha sa pipila ka mga kauban niyang bokal kon dili ba masamok unya kon karong Hulyo 24 sa ilang lungsod ipahigayon ang flying session sa Sangguniang Panlalawigan.

Kahinumduman kasamtangang giimbestigar karon sa Sangguniang Panlalawigan pinaagi sa Committee on Good Government and Human Rights ang kasong administratiba nga gipasaka batok kang Vice Mayor Dalogdog sa pipila ka meyembro sa Sangguniang Bayan sa Gutalac tungod sa pagdumili niini pagpirma sa mga ordinansa ug resolusyon nga mapanday sa ilang konseho.

Karong Hulyo 24 ang Sangguniang Panlalawigan sa ZaNorte mopadayon sa ilang flying session diin kini maoy una para karong tuig 2006 kon mahinayon human makanselar ang una nilang gikatakdang pagpahigayon niini didto sa lungsod sa Sindangan.

Matud pa ni Board Member Cabale ang ilang kasamok sa primero ra kato sa paglingkod gayud ni Mayor Mariano Candelaria, Jr. pagka mayor sa Gutalac. Apan karon matud pa ni Cabale ilaha nang ka jamming karon si Vice Mayor Dalogdog.

Kagahapon sa regular session sa Sangguniang Panlalawigan ang motion ni Vice Mayor Dalogdog nga nangayo ug lugway sa pagduso sa iyang tubag sa sumbong nga administratiba nga gipasaka batok kaniya.

Si Board Member Anecito Darunday ang chairman sa Committee on Good Government, mipahayag nga ipadayon nila ang imbestigasyon sa kaso ni Vice Mayor Dalogdog bisan pa man ug giingon na ni Board Member Cabale nga nakig jamming na nila ang ilang presiding officer sa Sangguniang Bayan sa Gutalac. Gawas lamang ug mosibog ang mga complainants sa sumbong batok sa bise mayor sa Gutalac, dugang pahayag ni Darunday. (Press Freedom, Vol. XVIII No. 43)

40M pahat sa DOTC para palapdan Dipolog City Airport

Mas mapadako na ang Dipolog City Airport sa dili madugay human andam na ang pahat nga 40 milyones ka pesos sa Department of Transportation and Communication kon DOTC alang na sa maong proyekto.

Nasayran kini sa atong pakighinabi kang Gov. Rolando Yebes ug Congressman Cesar Jalosjos atol sa maiden flight sa Cebu Pacific didto sa Dipolog City Airport. Ang duha ka mga opisyales nga gikan pa sa  panagtagbo kang Sec Leandro Mendoza sa buhatan sa DOTC didto sa kauluhan diin pormal na nga giandam ang 40 milyones ka pesos nga pahat alang sa pagpalapad ug pagpalambo pa sa Dipolog City Airport human duha na ka dagkong amyon ang mingsulod dinhi sa lalawigan sa Zamboanga del Norte.

Dugang pa ni Gov. Yebes nga kini nga pahat ang makatabang na unya ug dako sa kagamhanang lokal ug probinsyal diha na sa pagpalambo sa Dipolog city Airport lakip na niini ang pagpalapad sa runway, pagdugang ug mga suga niini aron pwede na kining matugpahan panahon sa kagabhion.

Ang gobernador ang mapasalamaton usab kini sa kompanyang Cebu Pacific sa pagsulod dinhi sa dakbayan sa Dipolog nga maoy makatabang unya sa pagpaubos sa pletihan sa eroplano tungod sa kompetisyon ug niana  adunay na usay opyon ang mga manakayay diha na sa adlaw adlaw nga biyahe padung ngadto sa kaulohan ilabi na ang mga magpapatigayon dinhi sa atong dapit.Pamahayag usab ni Atty. Alan Michael Ranillo ang Provincial ug Regional Tourism Council Chairman nga mas mapalambo pa niini ang natad sa turismo sa Zanorte pinaagi usab sa pagtanyag ug mga special package tour sa mga sumasakay sa maong mga ambyon ilabi na sa mga lokal ug internasyonal nga mga turista nga mobisita dinhi sa lalawigan.

*

HUDYAKA Village: Pagabuksan na!

Human sa usa ka bulan kapin ang minglabay nga nahimong nagmalampuson nga Hudyaka Zanorte 2006, buot ipadayon karon sa kagamhanang probinsyal sa pagpangulo ni Governor Rolando Yebes ang naandan na sa mga katawhan nga maghudyaka dinhi sa atong lalawigan, kini pinaagi sa pagmugna na usab ug usa ka Hudyaka Village nga pagabuksan karong umaabot Agosto ning kasamtangang tuig diha sa may kanhi ZN Cultural Center.

Kini nasayran, pinaagi ni Atty. Ivan Patrick Ang, Provincial Tourism Officer-Designate nga matud pa dako gayod ug ikatabang ang maong plano diha na sa pagpadayon sa pagpromoter sa natad sa turismo ug sa pagbaligya sa mga nagkalain-laing mga produkto sa mga lungsod ning lalawigan. Aduna usay live band entertainment nga bukas sa mga local bands ning syudad kada adlawng Biernes ug Sabado.

Matud pa ni Atty. Ang, nga walay gasto ang probinsya sa pagtukod sa Hudyaka Village tungod kay gi - recycle lang sa buhatan Provincial Engineering ang mga materyales sa kanhi nahimutangan sa Hudyaka Area didto sa ZN Sports Complex ug kini ibalhin lang diha sa kanhi ZN Cultural Center.

Ang maong Hudyaka Village ang bukas gihapon kini sa 25 ka mga lungsod ug 2 ka dakbayan sa Dipolog ug Dapitan diha na sa pagbaligya sa ilang mga produkto matag Biernes ug Sabado ug bukas usab kini sa mga gagmayng magpapatigayon aron mopahimutang sa ilang mga baligya nga diin barato ra gihapon ang renta sa mga booths nga ipahimutang diha sa maong dapit.

Buot sa usab ni Gov. Yebes nga kinahanglan dili malimtan sa katawhan ang nakatatak na nga pulong “HUDYAKA” tungod kay pinaagi niini nagkahiusa ang mga taga Zanorte diha na sa pagpalambo sa probinsya pinaagi sa pagpromoter sa mga tourist destinations ug pagpaila niini sa mga produkto nga abunda sa mga lungsod.

Gipahibalo usab sa tanang mga interasado nga mobaligya unya sa Hudyaka Village nga motawag lang kini sa buhatan sa Provincial Tourism sa telepono numero 212-9677 o mobisita lang sa maong buhatan diha sa 2nd Floor sa kapitolyo probinsyal ug makigkita lang kang Atty. Ivan Patrick Ang. (Mindanao Star, Vol.II No.26)

*

Pakigdait, Pagtinabangay giawhag ni Ladera

“Together, let us show that we are one and that we have one common dream that is, making life better for everyone,” kini mao ang gipalanog ni Senen S. Ladera, Executive Assistant IV sa gipahigayon nga monthly office conference sa Office of the Provincial Agriculturist karong bag-o pa lamang.

“We should maintain harmonious relationship among us,” sumpay pa ni Ladera sa iyang pakigpulong atuba-ngan sa mga permanent employees sa OPAg didto sa Irasan Demonstration Farm sa Upper Irasan, Roxas, Zamboanga del Norte.

Gipasabot sa executive assistant sa gobernador nga kung magkahiusa ug magtinabangay ang matag kawani ug opisyal sa matag buhatan ilabi na diha sa OPAg seguradong makab-ot gayud ang kalamboan alang sa mga mag-uuma nga gialagaran niini.

Apan kung magkaguli-yang dili usab mouswag ang panginabuhi sa mga kataw-han ilabi na ang mga mag-uuma sa kabukiran kinsa kanunay nga nagkina-hanglan sa mga ayuda ug proyekto gikan sa kagam-hanan, panapos ni Executive Assistant Ladera nga maoy mirepresentar ni Governor Rolando E. Yebes.

Samtang gipatin-aw ni Provincial Agriculturist-Atty. Bernardo P. Concha nga diha sa pagpanarbaho ug pag-alagad sa mga katawhan isip trabahante sa gobyerno angayan magba-ton ug talamdan nga himoong gabayan sa tanan.

“Obedience, loyalty and dedication o ginatawag nga OLD mao ang himoon nga gabayan sa pagpangserbisyo sa katawhan alang sa kalamboan,” matud pa sa provincial agriculturist. Sama nga adunay upat usab ka klase sa pangutok nga angayan nga timbangon sa matag usa dugang pa ni Concha ug mao kini ang: cloudy mind, cluttered mind, closed mind ug open mind.

Niining upat, giawhag ni Concha ang iyang ginsako-pan nga mosubay sa pinaka-ulahi nga mao ang open-mindedness sanglit aduna kini’y dakung kahigayonan nga makatampo sa kalam-boan tungod kay andam kini nga mosagop sa mga maayong pamaagi sa panginabuhi. “Be loyal to the service,” pahinumdom sa provincial agriculturist sa iyang ginsakopan sa OPAg ug ang panghinaut nga sa kanunay magkahiusa ang tanan alang sa tibuok katawhan.

Gituki sa maong tigum ang mga lain-laing suliran ug mga solusyon sa pagpanguma nga ikapaambit sa agriculturist ug agricultural technicians sa probinsiya sa mga mag-uuma sa lalawigan subay sa gisagop nga programa ni Governor Rolando E. Yebes nga, “Una sa Tanan, Katawhan.” (The New Nandau, Vol. XV No. 3)

*

Tungod kay wala mabadlong ang habal-habal
Motorcab drivers ug operators mohimo ug halapad nga ‘strike’ 

Ang ka inutil sa kapoli-san sa pag-implementar sa balaod ug sa walay pagpaka-bana sa kagamhanang lokal diha sa pagbadlong sa illegal nga operasyon sa habal-habal maoy nag-unang rason nga mopahigayon ug halapad nga ‘strike’ ang mga drivers ug operators sa mga de pasaheruang motorcab dinhi sa dakbayan sa Dipolog.

Ang pagpahigayon ug ‘strike’ sa motorcab drivers ug operators taudtaud na nilang giplano sa dihang misiaw pag-ayo ang pagpamasada sa mga habal-habal dinhi sa poblasyon ug ngadto sa bisan asang lugar dinhi sa dakbayan nga naka-apektar pag-ayo sa ilang inadlaw’ng abot.

Isip lihitimo nga de pasaheruan nga nagbayad ug prangkisa sa siyudad, gipahayag sa mga motorcab drivers ug operators nga dili makatarunganon alang kanila nga dili paminawon ang ilang sentimento isip nanginabuhi diha sa kadalanan. “Pareha man mi nga nanginabuhi, pero ang ilang operasyon illegal samtang kining amo legal kay nagbayad mi ug husto sa siyudad.”

Matud pa nila, tungod sa subra nilang pagsalig sa mga otoridad ug sa kagamhanang lokal, wala nila gihimo ang ilang nahaunang plano nga pagpahigayon ug ‘strike’. Apan sa taudtaud nang dagan sa panahon dayag naman hinuon kaayo ang pagmasada sa mga habal-habal dinhi sentro sa siyudad nga nakaapektar na sa ilang legal nga panginabuhi.

Ang ka-inutil sa kapoli-san pagbadlong sa operas-yon sa habal-habal maoy hinungdan nga nagapabilin kini ug nagkagrabe pa hinuon. Tungod niini, gipahayag sa ilang assosasyon ilang banhawon ang maong plano ang pagpahigayon ug halapad nga ‘strike’ sa mga drivers ug operators dinhi sa dakbayan sa Dipolog. Gibanabana nga moabot sa usa ka libo ka mga de pasaheruang motorcab ang mohunong sa ilang pagpamasahero sa adlaw nga ila kining pagahimoon.

Walay kabalak-an

Usa ka pribilihiyo alang sa mga drivers ug operators sa de pasaheruang motorcab ang plano nga mopahigayon ug halapad nga ‘strike’ dinhi sa dakbayan sa Dipolog, apan sila ra usab ang maalaot.

Kini maoy gipadayag ni Mayor Roberto Uy atuba-ngan sa plano sa sector sa transportasyon nga mohimo ug ‘strike’ tungod kay walay nahimo ang siyudad sa ilang gipadangat nga reklamo batok sa nagka grabe nga operasyon sa habal-habal.

Matud pa ni Mayor Uy dili mapugngan ang plano sa mga motorcab drivers ug operators nga mohimo ug ‘strike’ kay kini ilang pribilihiyo ug katungod. Apan makahatag ra usab kini ug kaalaot sa tanan ilabi na kanilang mga anaa nanginabuhi sa kadalanan.

Wala mabalaka si Mayor Uy sa maong plano gumikan kay matud niya, dili lamang motorcab ang gisaligan sa mga sumasakay’ng publiko kay anaa ang daghang de pasaheruang multicab nga nagserbisyo usab sa mga katawhan.

“Kung dunay problema kinahanglan estoryahon ug sulbaron, dili anang mag-strike..pero ug himoon wala tay mahimo kay ila man kanang katungod,” panapos nga pamahayag ni Mayor Roberto Uy. (The New Nandau, Vol. XV No. 3)

*

Human sa nahimong dakung kalampusan sa bag-ohay pa lamang gipahigayon nga 2nd Hudyaka Zanorte Festival nalakip na karon ang atong probinsiya sa gitukod nga Central Philippines Tourism Circle.

Kini ang gibutyag ni Gov. Lando Yebes human siya mitambong sa imbitasyon ni Pangulong Arroyo dungan sa Regional Development Council and Cabinet Meeting didto sa Malacañang sa Sugbo, Cebu City karong bag-o.

Ang maong panagtagbo gahisgot sa paglangkob sa Zamboanga del Norte sa Central Philippines Tourism Circle, kini gumikan sa kamabungahon sa nahimong resulta sa Hudyaka Zanorte 2006. Tulo lamang ka mga probinsiya dinhi sa Mindanao ang nalakip sa Central Philippines Tourism Circle nga gilangkuban sa atong probinsiya sa Zamboanga del Norte, Camiguin ug Surigao del Norte.

Matud pa ni Gov. Lando Yebes nga daku kaayo kini ug pabor para sa atong probinsiya nga mahatagan ug kahigayunan nga mapa-ila-ila sa laing mga dapit ha-om usab sa iyang kampanya pagpalapad sa industriya sa turismo.

Sa maong tigum partikular nga nahinganlan ang dakbayan sa Dapitan kinsa gipuy-an kani-adto sa atong nasudnong Bayani nga si Dr. Jose Rizal ingon man ang  Dakak Park and Beach Resort  nga anaa usab mahimutang sa siyudad sa Dapitan.

Mitukma usab ang pagsulod sa duha ka mga kompanya sa transportasyon dinhi sa Zanorte nga nalakip ang atong probinsiya sa Central Philippines Tourism Circle. Karong adalawa mao na ang unang adlaw sa pagbiyahe sa abyon sa Cebu Pacific gikan dinhi sa Dipolog padulong sa Manila samtang miserbisyo na usab ang barko sa Negros Navigation nga mobiyahe padulong gihapon sa Manila via Ilo-ilo ug Roxas City.

Ang mga kadagku-an sa duha ka mga kompanya sa transportasyon sa Negros Navigation ug Cebu Pacific namahayag nga ilang dad-on ang mga nagkada-iyang turista gikan sa mga nagkala-in laing dapit pa-ingon dinhi sa Zanorte pinaagi sa ilang barko ug abyon nga ani-a na karon nagserbisyo dinhi sa lalawigan.

Kahinumduman nga ang industriya sa Turismo ingon man Agrikultura maoy gihingosgan karon sa administrasyong Yebes aron malambo ang atong ikonomiya pinaagi niini ug makapahimutang pa ug dugang mga proyekto ug programa para sa katawhan sa lalawigan. (Mindanao Star, Vol.II No.26)

Gatecrasher
By: Nico L. Balbuena
Bag-ong Panid

Sama sa usa ka bitoon sa kawanangan, ang dakbayan sa Dipolog mipadayon sa iyang pagsutoy kun kalambuan ang pagahisgutan. Sama sa usa ka bitoon, bisan pa man kun ang kalangitan ngitngit kay nagsige ug ulan ug natabunan kini sa mga panganod, apan kining maong bitoon anaa lamang sa likuran, nagtagad nga mounding na ang ulan ug mahanaw na ang nakatabon niini.

Tuod man, ang Dipolog susama sa usa ka bitoon. Kay ngano man? Tungod kay kini ang walay undang sa iyang pagbugwak sa iyang kahayag bisan pa man sa kadaghang mga hagit nga iyang naagian. Dili na ikalalis ni bisan kinsa nga ang dakbayan sa Dipolog nahimo na karong usa ka dakbayan nga nakitang paspas ang pagsubang ug di na kapugngan ang mga kalambuan.

Niining bag-o pa lamang mga adlaw, nagpadayon ang pagpanghimo sa mga balay patigayon kansang pagbukas unya sa ilang mga patigayon ang makahatag sa bag-ong mga higayon nga matagaan ug daghang mga trabaho ang mga katawhan ug ang buhis nga ibayad ang makadugang sa panudlanan sa dakbayan. Kun ikaw usa ka masusihon nga tawo ug nagbaton ug maayong obserbasyon, hayan ikaw nakamatikud sa pagsulbong sa ekonomiya sa katawhan. Hayan imong nabatyagan nga sa matag hapon nga tanan, ilabi na pagdangat sa taknang tigpanguli gikan sa mga tulunghaan ug sa mga buhatan, tingali imong namatikdan nga nagsugwak ang mga katawhan.

Kini usa ka timailhan nga ang dakbayan walay hunong sa pagtubo ug paglambo. Kining maong panghitabo dili na mapugngan. Nagkinahanglan na kini sa pagdumala sa usa ka lider o pinuno sa kagamhanan nga adunay igong katakos nga makigharong sa mga hagit sa paglambo. Ug kini ang gipakita ni Mayor Roberto Y. Uy. Sa iyang paglingkod isip Mayor gikan pa sa 1998, iya nang gipakita sa tibuok kapupud-an kun giunsa niya pagdumala ang dakbayan nga kusog man kaayo ang iyang kalambuan. Siya wala nagtagad sa mga negatibong reaksiyon sa mga oposisyon sa iyang mga programa.

Hinoon, siya nadasig nga iyang atubangon ang matag pagbaraw sa mga kalambuan. Ug tuod man, wala makawang ang iyang mga pagpaningkamot. Pagkakaron, ang Dipolog nailhan nga usa ka dakbayan nga malambuon, hapsay ug limpyo gawas nga kini nagbataon ug daghang mga lugar nga mahimong kalingawan sa mga dumuduong.

Dugangan pa niini nga ang katawhan sa Dipolog halos tanan maabi-abihon ug andam nga motabang kun ang ilang mga katakus ug kaalam ang pagahisgutan. Busa, dili ikatingala kun nganong daghang mga dumuduong ang nagpakita sa ilang kahimuot sa panahon nga sila moduaw niini. Gani, ang uban nakahukom nga magtukod sa ilang mga panimalay ug mobubo sa ilang mga negosyo kay ilang nakita ang haluag nga dalan alang sa ilang kalambuan. Kini nagpakita nga ang paglambo sa Dipolog dili na kapugngan. (Dipolog Chronicle, Vol.VI No.3)

Credits: Dipolog Chronicle is published every Saturday and its Editorial Office is located at 059 Lacaya St., Dipolog and can be reached through the following Tel. No.: 212-2255

*

HULAGWAYBALITA:
 

 
Ordinansa nga naglantaw sa kaayohan sa kababayen-an gipadas-og sa konseho

Usa ka public hearing ang gipahigayon niadtong Hulyo 14  sa hawanan sa Sangguniang Panlungsod sa Dipolog may kalabot sa ipadas-og nga ordinansa alang sa kaayohan ug kalamboan sa mga kababayen-an dinhi sa dakbayan sa Dipolog.  

Sumala pa ni Konsehal Romulo “Moling” Soliva, ang kasamtangang chairman sa SP Committee on Women and Family, nga ang nasangpit nga ordinansa nga gipangamahan ni Konsehala Nenita B. Lacaya mao unya’y mahimong Women’s Welfare and Development Code of Dipolog City ug kini usab ang magsilbing gabayan unya sa programa ug mga proyekto nga i-implementar sa kalambo-an sa mga kababayen-an ning dakbayan. Dugang pa ni Soliva nga ang nasangpit nga ordinansa mao usa’y mahimong gabayan sa mga lokal nga balaod aron sa pagpanalipod sa katungod ug pribilihiyo sa mga babaye nga na-obserbahang gi-abusuhan sa ubang katawhan karon.

Ang mga mitambong sa nasangpit nga public hearing mao ang mga kababayen-an gikan sa nagkalain-laing sektor sa komunidad. Gidapit usab ni Konsehal Soliva ang ubang kababayen-an nga interesadong motambong sa nasangpit nga public hearing alang sa Women;s Welfare and Development Code sa Dipolog City mihatag sa ilang mga bulawanong hunahuna o suhestiyon alang sa pagmugna sa maong Women’s Code. (Dipolog Chronicle, Vol.VI No.3)

*

Pulso Sa Katilingban
Cicer M. Binghay
Duna kahay election???

Catholic Bishops Conference of the Philippines miluwat sa ilang Pastoral Statement nga gibasa ni CBCP Pres. Lagdameo niadtong Julio 10/06 sa TV.  Mihisgot pagsupak walaon ang piniliay karong 2007.  Ipatigbabaw ang “suffrage” katungod ug obligasyon “to vote in the election of all officers chosen by the people and in the decision of public questions submitted to the people.  Suffrage which is classified as political right enables the citizens to participate in the process of government to assure that it derives its powers from the consent of the governed.  Election which relates to the vote of the people for public officials in the local and national governments.”  Nahisgotan nga ilang gipanghimaraot ang mga “extra judicial killings” nga daghang wala mahibalo o ipahibalo sa publiko nga nahibaloan sa dioceso.  Dayon, “CBCP is not inclined to favor PGMA impeachment moves.  Gani 18 sa ilang ginsakopan ang nakapirma sa maong impeachment.

Mabalik nato paghisgot nga si PGMA nakapakita sa makadaghan sa iyang kalantip ug kalig-on batok sa iyang mga kaatbang ug mga kaaway sa politika.  Ugod matod pa sa usa ka bantogang Heneral nga insek, masayon pildihon ang kontra kon unahon nimog sinati imong kaugalingon unsa imong gahom ug kalig-on, dayon, sination pag-ayo ang kontra kon asa sila ig-a.  Kon dihang dapita sila mawad-an sa kusog diha dukdoka.

Walay natingala nga diha sa balay balaoranan sa kongreso, mayoriya sa mga kongresista, permaninti rampa-raram kang PGMA.  Sukad sa iphanay sa balota sa presidential, impeachment complaint, mga blue ribbon investigation ug hangtod na niining bag-ong gitumod laing impeachment, tanan, mahisulat lamang sa kasaysayan, sa hinungdan ngano nga wala moipekto sa panahon ni PGMA.  Ngano nga igo lang mamantala masud-ong sa katawhan, dayon sama sa daob nga karon nagasiga pa dayon pagka tiod-tiod mapalong.

Malisod maliso ang mga ulo sa atong mga kongresista nga mga mayoriya nga nahatagan sa nanubra nga mga kaayohan pinaagi sa daghang mga national ayuda ilang nakumkom gikan sa presidenti.  Kaha sakit sa ilang kabubut-on ang pag-apil tabon sa mga baho ug kadunot nga kalihokan, apan mag-unsa sila kon ang kasulaw ug kabagni sa tinagingting sa bulawan ang moarnat.

Walay gipili sa salapi sa pagka gamhanan.  “There is little doubt that money is perhaps the universally most interesting object to all of us.”  Balikon nato, “Money is a horror, but what it can do is fantastic.”  Matod pa ni Henry O. Dormann.  “Money is like a sixth sense without which you cannot make use of the other five.”

Dili ikatingala, nga nakugang si PGMA sa CBCP dihang kini nag-apil sa Impeachment complaint diin 18 tagad ang nakapirma.  Mao man gani nga daghang mga gipalusot mga pulong batok sa CBCP gikan sa palasyo nga dili angayan mag-apil-apil ang simbahan sa pamolitika.  Dayon sama sa “abrakadabra” magic spell nga mga pulong, takulahaw, milutaw, diha pa gyod sa Pastoral Statement nga ang maong kapunongan walay hilig, mo pabor sa maong impeachment.  Matod pa ni Voltaire, French Philosopher and Writer.  “When it is a question of money everybody is said to be of the same religion.  Usab midason si Will Rogers, American humorist syndicated column, nakaingon: “Politics has got so expensive that it takes lots of money to even get beat with.”

Mao lagi, nagpabilin ang tanghaga nga nahisulat sa mga dagkong pader ug kahanginan:  Madayon kaha nga dunay piniliay karong Mayo, 2007???  Katingad-an ahensiya sa COMELEC walay timik.  Malacañang gipasulabi gihisgotan, gihingosgan ang Cha-Cha, pang-appoint mga paborito ug dunay kadugo magdumala sa PNP ug militar, ginsakopan sa kabineti ug ubang mga pangandam paglig-on sa iyang administrasyon.  Dili matabang ang ilang hulhog mawala ang mga senadores ug pagpatunhay sa pang gobyerno parliamentary.  Unya naay daghang salapi gigastos sa people’s initiatives, kanang gipapirmahan sa katawhan nga hinungit daan.  Duna kahay election??? (Press Freedom, Vol. XVIII No. 43)

Ingon siya isog, bahag man lagi iya ikog?

Alang-alang ko mapungot ug alang-alang kong mahimuot nga nagpaminaw ni elmer Elmedolan sa iyang  programang gitawag ug KATIN-AWAN  na hasking nakalatigo sa mga opisyales gikan didto sa dakbayan sa Dapitan raspa na ngadto sa tersero distrito. Ang iyang gihimo mora ba siyag naghurementado kay taman sa iyang mahinumdoman iya man dayong tirahan…..tira nga nagdala ra ba ug kantalita.  

Apan usa lang ka butang ang akong namatikdan ning tawhana…mo discuss siya ug mga issue nga siya wala gayod mahibalo sa kalingtunganay niini kay lagi, igo raman siyang gi-abunohan ug gitagaan sa iyang mga reporter o kaha nagagikan sa mga raw reports sa mga tawo nga sa iyang pagtuo may kridibilidad nga moabot kaniya ang maong taho. Igo ra siyang sultihan nga mao kana mao kadto dayon lang siyang tuo nga wala gani ang himong verficication…singal dayon didto sa mikropono ug dayong haros sa iyang latigo. Usa niini mao kadtong iyang tirada nga kuno ang mga global lights didto sa Dapitan gipangmonta ning maong mga sugang dagitabnon! Ang nakaparat kay wala gayod kini niya korehii ug nagpadayon lang siya… ingon ba nga wala niya kini mayawyaw ug mosulti! Lain niyang blunder mao ang iyang gibalikbalik nga pasangil nga kuno gibanggaan ang nataran ni Konsehal Mening Balisado sa sakyanan nga gimaneho ni Patrick Chan.  Apan amo mang gituyo gyod ug susi didto wala may bisan karas na lang sa iyang nataran ang imong makita agi sa pagkabangga sa maong sakyanan? Dis-a man si Elmedolan niini ug basehan nga gibalikbalik man niyang sing-al sa iyang programa?Unsa may iyang tuyo ug tumong.. Para lang gayod siya makalbugal-bugal?Hangal!

Sa iyang susamang programa, mireklamo siya nga kuno sig siyang gi-subject sa character assasination nga kuno gisaway ang iyang pagkatawo ug daghan pa kunong pagdaot sa iyang personalidad. Pastilan gyod ka, Elmedolan, sa sinugdan wala may nanaway nimo niadto.. Ikaw may nanguna ug tirada nga personal na kaayo. Ikaw may nanglatigo ug below the belt na kaayo ug kon baslan diay ka masukog moreklamo ka?

Katarungan nimo, dili ka ang angayan baslan kay usa lang ka ka-mediaman ug imong katungod nga mosaway sa mga dautan ug kahiwian sa nanilbihan sa atong kagamhanan. Correct ka dyan. Señor Elmedolan nga tahas sa mga mediaman ang pagsaway sa mga dautang binuhatan sa mga nangatungdanan sa atong katungdanan. Apan lagi sa kabugok sa imong pagsabot, nagtuo ka nga kay mediaman ka may lisensya ka na nga mangatake sa personal nga pamaagi. Nalimtan mo na nga kon nanaway ka di mo kana pakapinan ug bugal-bugal ug dili mo ilabot kadtong walay mga labot.Apan unsay imong gihimo, pinaturagas lamang ang imong pagpanghimo apan gilatos mo! Naa pa gayo’y styl nga milahos ka lag discuss sa mga butang nga nagkinahanglan ug legal interpretation diin ikaw walay hibangkaagan apan sa unsay imong gihimo.. makighagit pa gani ka pag debate ug abogado kay ikaw sab kuno  may igong kahibalo. Matod mo, usa ka ka –MA..morag abogado! Nganong naingon niana ang imong pagpractice sa imong profession..ka kon lehitimo ka mang mediaman? Makigdebate ka sa mga abogado nga debate man ang ilang kinaon matag adlaw, Amaw? Mabugalbugalon ka ra gayod kaayo! Galot nga walay sama!

No, Elmer Elmedolan, ayaw himoa ang panagang nga kay mediaman ka, di ka sab mabaslan ug atake. Alang sa imong kasayuran, kay miangkon ka man nga usa ka mediaman, di kasab makalikay ug pangatake kay sama sa mga anaa karon nga nanilbihan sa atong gobyerno, ikaw sab usa ka Public Figure sumala  gi-defin sa atong KorteSuprema sa kaso nila ni Arturo Borjal vs. Court of  Appeals, et al., G.R N.  L-126466 SCRA 861.. nga na disaydan  niadtong  Enero  14, 1999. Ang imo sab nga pagka  public figure  gituki sab sa Supreme Court sa kaso ni Ayers Production Pty., Ltd. vs. Capulong 160 SCRA 861..diin ikaw, mi-claim ka man nga mediaman, usab usa ka Public Figure ug mao nga ikaw sab mahimong masaway ug maatake susama niadtong mga tawo o empleyado sa gobyerno nga giayog latigo nimo.dili ka makaangal ug makasiyagit nga “hep hep hep di mo ako maatake ug masaway kay isip Public Figure mahimo sab nga utingkayon pa ang sugilano sa imong kagahapon kay kana tipik sa imong pagkatawo ug dili mo angay nga itago sa katilingban. Busa, kon ikaw sawayon sa imong pagpakamananapaw, dili ka undo makaangal kay lagi, ikaw usa sa ka Public Figure. Kay Public Fugure di mahimonga motago ka sa habol sa imong pagka-mediaman kay ang katawhan sab may katungod nga mangutingkay sa imong pagkatawo kay gikinihanglan kana sa pagsusi nila sa imong kredibilidad...nga may kridebilidad ka ba nga paminawon ug tuhuon sa imong gipamulong.

Korek kaayo ka nga ang mediaman may katungod nga manusinusi diha sa salapi sa panudlanan sa atong kagamhanan kay imong kanang katungod isip magbubuhis! Tayim pa, gipanghambog mong usa ka magbubuhis.. ambi, isulti kuno sa kahanginan kon pila ang nabuhis sa atong kagamhanan. Aw, nag-file ka ug Income Tax Return Elemer Elmedolan nga isog ka man nga moingun nga ikaw magbubuhis pila bay imong nabuhis ha?

Mireklamo ka nga giayo kag atake sa mga kolumnista nga may simpatiya kang Govenor Yebes..nga  ikaw biktima sa character assasination. Kon mao, ngano mang panakotan ug binakak nga komentaryo nga ang tuyo lang gayod nimo nga ikaw makabugalbugal ning mga tawhana. Kusog ka pa nga mamersonal hinungdan bitaw nga gikiha kag Libelo..unya karon ikaw mo-reklamo ka kon balihon kag latigo?

Isog ka...matod mo, nga molatigo sa mga kawani ug pulitiko ngano  wala magtinarong sa ilang trabaho. Wow, fine, apan isog diay na sa dihang gipusil ang kanhi kauban nga SURINGIW (siya ra poy ga-angga kaniya niini) haskan man nimong pangayog pasabot sa katawhan nga kuno ang imong gibuhat trabaho lang sa usa ka mediaman. Mi-isplikar ka pa ngano nga ikaw padalhan ug mga threats nga imo man lang gibuhat ang gimbuhaton sa usa ka mediaman!Amaw ka gyod....kon constructive pa ang imong criticism may mohulga ba kanimong mga tawo. Ikaw gud, kon makaatakae ka. Mora na kag nakabunal ug sawa..todo bunal gyod nga kana bang dili na ka makatuyhad! Aw matud mo isog ka ngano mang moingon ka nga imo nalang kini nga isalig sa Ginoo. Well, Elmer Elmedolan, nahibalo na niini ang Ginoo ug sayod siya nga nakabuhat kag dako ug daghan sala kay na-personal kag atake  sa imong isig ka tawo. Sigurado ko nga dili ka tagdon sa Ginoo tungod sa imong gibuhat nga nakapasakit sa daghang balatian sa imong isig ka tawo. Sigurado ko nga dili ka tagdon sa Ginoo ug sayod siya nga nakabuhat kag dako ug daghan sala kay na personal kag atake sa imong isig ka tawo. Tiaw mo kana, maayo kaayo kang molatigong personal sa imong isig katawo ug wala mo kini mahunahunai nga ang imong gilatigog maayong larawan sa atong Ginoo?

Hibalo ko nga daghan na ang nagdumot nimo tungod ning imong gipanghimo nga nakatungina pag-ayo sa ilang mga balatian. Sayod ako nga daghan kanimo ang nag-ampo nga mahitumpawak ka ra unta sa kalisdanan ug kadautan. Daghan ang nagdumot kanimo nga kon may higayon lang unta , tadtaron ka ug pinopinohon aron kilawon o kaha daghan ang nag-ampo nga unta may mga tawo nga itom ug kalag ang nagplano kon unsaon ka pagsakmit aron batobatoan ka didto sa lawod, sayod ako niana!Niini, ayaw pagtawag ug tabang sa Ginoo kay ang Ginoo dili motabang  niadtong mga tawo nga ang mga kamot hugaw ra upod kaayo. Gawas pa, you claim nga isog ka. Busa ayaw pag-itugyan sa Ginoo ang imong kaluwasan. Hinunoa, adto isalig sa imong gisaligang AMO ang imong kaluwasan gikan niining mga tawo nga imong gipanghilabtan nga wala ba makaantos sa imong linuog nga binuhatan isip mediaman. Sooner or later imo rang maalimungawan didto unya sa imperyerno nga diay dili maayo ning magpataja tag panghilabot sa kinabuhi sa atong isig ka tawo! (Mindanao Star, Vol.II No.26)

UNANG GINANG MALAUMON TURISMO DINHI MAPALAMBO

Sa nalambigit nga kalamboan, gilantaw usab ni Unang Ginang Evelyn T. Uy, ang kasamtagan City Tourism Council chairperson, nga mo-usbaw ang paghidangat sa mga turista dinhi sa dakbayan ug lalawigan tungod kay ang fare rate sa abyon adunay pagkonhod sa pagkakaron.

Siya naglaum nga adunay pag-usbaw sa mahimong kita sa mga kan-anan ug mga hotels.Gani sa dugay nang panahon naningkamot na sila sa konsiho sa turismo sa pagbaligya sa Dipolog pinaagi sa mga tourist spots dinhi sa dakbayan, sama sa SUNGKILAW falls, ECO tourism park, LINABO peak, RIVER cruise ug daghanan pa.

Namatikdan karon nga kanunayng puno ang arrivals sa eroplano nga usa pa lamang nagbiyahe kaniadto. Sa pagkakaron adunay nay laing abyon sa Cebu Pacific nga nagbiyahe Manila-Dipolog busa adunay pag-usbaw sa mga local ug foreign tourists. Subay niini, hayan adunay mga package deal ang pagahimoon sa mga travel agency ning dakbayan aron mapalambo pa niini ang torismo sa siyudad sa Dipolog.

Dili na usab maglisod ang mga mamumohunan ilabi na ang mga lokal nga mag-uuma sa pagtumod sa ilang abot sa umahan tungod kay adunay  abyon nga ilang kakargahan sa ilang produkto.Sukwahi kaniadto nga usa lamang ka eroplano ang kargahan ug ang kamahal sa nahimong pletihan maoy hinungdan nga walay negosyante nga nagpadala sa ilang produkto didto sa kaulohang Manila. (Dipolog Chronicle, Vol.VI No.3)

*

MORE NEWS NGA BINISAYA