May 3, 2007

SECOND WAVE SA PANGTERORISMO SA LAKAS, NAGSUGOD NA

Gisugdan na karon sa pundok sa oposisyon sa Zamboanga del Norte ang ilang ikaduhang hugna sa pagterorismo sa mga katawhan sa ZaNorte atubangan sa nagsunod-sunod karong mga insidente gikan sa pagpamomba hangtod na sa pagluthang sa pipila ka kapitan nga nagpaluyo sa Alliance of Parties for Progress-Kabalikat ng Malayang Pilipino o APP-KAMPI.

Kini karon ang nakita nga lihok sa pundok sa oposisyon sa ZaNorte nga gipangu-luhan sa mayor sa dakbayan sa Dipolog diin, unang insidente natala sa miaging semana sa dihang gisulong sa mga armadong grupo nga kaalyado nila ni retired Police General Prospero Noble ug Mayor Roberto Uy nga gipanguluhan nila ni Imam Edgar ug Ustadz ang Barangay Culaguan, Sibuco. Ang maong insidente gisundan sa pagtanom ug tulo ka mga bomba diha mismo kini sa municipal building sa lungsod sa Sibuco niadtong biyernes Abril 20,2007 diin, ang usa niini mibuto gayod.

Ang pagtanum sa maong bomba ug pagpa-ulbo niini gitunong sa bisperas sa proclaimation rally nila ni Governor Lando Yebes ug Vice-Governor Francis Olvis didto sa Sibuco uban nila ni Mayor Norbi Edding ug mga kauban.

Apan bisan pa sa maong insidente padayong gidasmagan ug bagang duot sa katawhan sa lungsod sa Sibuco ang ilang rally. Kini gisundan sa pagbuto sa laing homemade bomb didto sa Compra,Liloy diin ang gipuntirya mao ang tindahan sa barangay kapitan nga si Bienvenida Quirante. Sumala pa sa biyernes sa gabii,Abril 20,2007 nagpahigayon ug rally silang Noble sa ilang barangay sa Compra apan nabulabog kini ug namauli og sayo ang mga katawhan diin, si Kapitan Quirante maoy gipasanginlan nga maoy nagpabulabog sa ilang rally sa oposisyon.

Pagka-kadlawon maoy namatikdan sa kapitan sa Compra nga nagsige na lang og usig ang ilang iro busa ilang gisubay. Sumala pa maoy misugat sa ilang panan-aw ang usa ka homemade bomb nga gipatong sa usa ka mono bloc chair nga ginama sa tubo ug giliyukan og mga gasoline nga gisulod sa plastic nga botelya sa mineral waters. Si Governor Lando Yebes mikonpirmar nga nakakita pa siya sa maong bomba sa dihang nalabay sila sa Liloy paingon sa ilang biyahe sa Sibuco.

Ang nasangpit nga bomba wala gayod matandog kay walay bomb expert nga maantido modefuse niini busa gipasagdan ra diha sa kilid sa tindahan samtang nagpalayo usab nga nag-alirong ang mga katawhan nga natapok tungod niini aron mang-usyuso. Ang maong homemade bomb sumala pa mibuto mga alas 10:00 ang takna sa buntag. Wala hinuoy nasam-dan ug naigo niini apan puwerting gubaa sa tindahan ni Kapitan Quirante sa Compra, Liloy. Samtang usa ka landmine ang gitanom sa dalan duol sa utlanan sa lungsod sa Siocon ug Baliguian nga nakit-an sa mga miyembro sa Philippine Army diin, gituohan nga ang gitagan-an niini mao ang convoy nila ni Governor Yebes ug Vice-Governor Olvis nga adunay gikatakdang proclaimation rally didto sa lungsod sa Sirawai ug Sibuco.

Ang mga insidente sa 3rd district gitubag sa pagpusil sa usa ka miyermbro sa LANDO-BIBO sa lungsod sa Rizal nga gipusil nga adlawng dako diin, ang gigamit pagluthang kalibre .45 nga pistola ug 9mm pistol atubangan sa bulangan sa Mapang,Rizal niadtong Sabado sa buntag. Ang biktima giila nga si Dodoy Abne nga nagbaton ug pito ka mga samad sa balas a pusil. Ang pagpusil sa miyembro sa LANDO-BIBO sa Rizal gitubag sa nahitabong pagpusil sa barangay kapitan sa Sianib, Polanco nga si Honorato Magtaka. Samtang mga alas 6:00 sa gabii si Kapitan Perpetua “Perper” Montemayor sa barangay Cape, Roxas ang gipusil usab sa bata-bata ni Mayor Carling Feras. Giila ni Kapitan Perper ang nagpusil kaniya nga mao si Lito Mandas nga lumulopyo ra usab sa ilang barangay. Matud pa ni Kapitan Perper maayo na lang gani kay wala siya maigo sa pagpusil ni Mandas.

Sumala pa gikan siya nag-meeting ug nalabay sa balay ni Mandas uban sa iyang barangay tanod. Si Perper midugang sa pagsaysay nga gibunalan sa tunod ang iyang tanod ni Mandas busa iyang gibadlong apan misaka kini sa ilang balay ug nagkuha’g pusil og gipusil dayon siya, apan suwerte na lang kay wala siya maigo. Si Governor Rolando E. Yebes sa dihang nakuhaan og reaksiyon atol sa proclamation rally sa APP-KAMPI didto sa lungsod sa Siayan, nagkanayon nga karon ra kini nagpanghitabo dinhi sa atong lalawigan kay sa eleksiyon sa 2004 walay mga bombings nga natala sa 3rd district. Matud pa ni Governor Yebes kining tanan tataw kaayo nga binuhatan sa mga tawo nga expert na daan kabahin na sa pagbuhat ug mga bomba. Gihisgutan ni Gov. Yebes nga sa dihang milansar sila sa miagi, malinawon man ang atong lalawigan sa ZaNorte.

Sa laing higayon kini mipalanog sa iyang pag-apilar sa pundok sa oposisyon nga unta dili sila mogamit ug mga pamaagi nga ma-tererorismo ang mga katawhan og maoy mahimong makaluluoy. Sa samang bahin ang gobernador nanawagan sa provincial police director nga kon mahimo ipahimutang sa COMELEC control ang lugar nga init na ang ilang sitwasyon sa politika. Gipanghinaot ni Governor Yebes nga unta ang pundok sa oposisyon mosunod sa gimbut-an sa balaod ug maoy istoryahan ang kaba-hin na sa nagkadaiyang isyu og dili ang paggamit og armas o bomba para matug-kan og kalisang ang atong mga katawhan.

Taliwala sa mga nagpanghitabo karon nga ang ilang mga lideres sa bara-ngay og sakop sa LANDO-BIBO, si Governor Yebes miangkon nga gibati na siya karon og kahadlok ilabi na sa mga bomba nga iyang nakita. Sa iyang kabahin si Vice-Governor Francis Olvis nagkanayon nga ang eleksiyon igo rang magpili sa mga lider ang mga katawhan. Kon ang tuyo sa pikas grupo nga magpinat-yanay sila niini nga eleksiyon ang mamahimo niining makaluluoy mao ang mga kabataan. Unta pasagdan lang sa mga politico ang mga katawhan nga magpili sa mamahimo nilang lider. Matud pa ni Vice-Gover-nor Olvis nga unta likayan nila ang pagamit sa teroris-mo. Sama sa gobernador si Vice-Governor Olvis mi-hangyo sa ilang kaatbang nga unta dili sila mogamit og terorismo kay kini maoy makamaot sa politika sa atong probinsya.

Susamang bahin, mga panawagan ang gipalanog usab sa mga pili-onon pagka-board members sa 2nd district nga sila si Board Member Cedric Adriatico, Atty. Ricky Mejorada ug ni Mat Ranillo III ang kandidato pagka-kongresista sa APP-KAMPI. Sa laing bahin, sama ra nga gi-angkon ni Prospero Noble, retiradong heneral ug kandidato pagka-kongresista sa ikatulong distrito ilawom sa partido Lakas nga may kalambigitan ang ilang ilang grupo sa oposisyon sa mga homemade bomb nga napalgan sa mga lungsod sa ikatulong distrito ning lalawigan. Atol sa pagpirmahanay sa usa ka kasabutang pangka-linaw o peace covenant nga gipasiugdahan sa simbahang katoliko sa lungsod sa Liloy ning lalawigan, buhatan sa comelec ug kapulisan sa maong lungsod, gi-angkon ni Noble nga sa dula sa politika kini adunay psywar 80 porsiento ngadto na sa 100 porsiento.

Matud pa ni Noble nga kong puntirya gayod sa maong bomba nga adunay napagan, nabiktima na unta ang mga sakyanang pasaheroan nga nagbiyahe gikan sa Siocon paingon sa Baliguian diin, adunay usa ka land mine ga nadiskobrehan sa mga sakop sa Phil. Army. Siya midugang nga kong aduna may bomba nga napalgan sa balay sa kapitan didto sa Compra Liloy kini iyang gi-angkon nga usa usab nga psywar kay gibutang kini panahon na man nga wala nay tawo dihang wala natiwas ang ilang rally nga gihimo sa maong barangay tungod kay gibato sa mga tawo nga nasuko gumikan sa mga grabeng pagdaot ni Noble ug nga kauban sa mga kandidato sa APP-KAMPI didto sa barangay Compra.

Ang maong pulong ni Noble nagsilbing tubag sa naha-unang pamahayag ni Cong. Cesar Jalosjos nga nag-awhag kaniya nga hunongon na ang pag-terorismo sa mga katawhan sa tersiro sama sa nagapang-hitabo karong bag-o diin, sunod-sunod nga adunay mga bombang gitanom sa mga lungsod sa maong distrito. Sa maong panawagan ni Cong. Jalosjos, si Noble wala mohimakak niini hinuon siya kusganong miingon nga ang mga bombang napalgan sa maong distrito, psywar lamang ug mi-awhag pa ni Noble ngadto sa APP-KAMPI nga dili pugngan ang mga katawhan nga naminaw sa ilang mga rally, usa ka butang nga gihimakak ni Cong. Jalosjos ug mga kandidato sa APP-KAMPI sa 3rd district tungod kay wala mahitabo nga gipugngan nila ang mga katawhan sa pagtambong sa mga rally sa Lakas.

Gibutyag ni Bokal Dodong Bolando nga adunay mga rally sa Lakas nga gamay lamang ang mga tawong naminaw ug usahay walay mga tawong nanambong sa mga rally niini. Atol sa peace covenant didto sa lungsod sa Liloy, kompleto ang mga kandidato sa APP-KAMPI nga naglangkob nila ni Gov. Rolando E. Yebes, Cong. Cesar Jalosjos, upat ka mga bokal nga sila si Board Member Bolando, Jojo Ajero, Sitoy Darunday ug Bong Eding lakip na ni mayoralty candidate Bechu Uy ug iyang bise mayor ug mga kandidato sa Sanguniang Bayan ug bugtong si Vice Gov. Baby Olvis lamang ang wala makatambong tungod kay adunay kini’y opisyal nga lakaw sa kaulohang Manila.

Sa partido Lakas si Noble lamang uban sa usa ka kandidato pagka-bokal sa 3rd district, kandidato sa pagkabise mayor sa Liloy ug mga kandidato sa Sanggu-niang Bayan, samtang wala mopatim-aw si Mayor Berto Uy sa Dipolog ug ang ilang kandidato pagkamayor sa lungsod sa Liloy nga si Shobing Lim ug uban pang kandidato pagka-bokal. Human sa pagpirma sa nahisgutang peace covenant tali sa APP-KAMPI ug LAKAS ang mga pili-onon pulos mipalanog nga andam silang motuman sa ilang gikasabutan nga ipatigbabaw ang kalinaw niining nagsingabot nga piniliay. Gipaklaro usab ni Noble nga andam siyang mosunod sa maong peace covenant kay siya nagtoo nga usa ka balaang katungod sa mga katawhan ang pagpili sa ilang kandidato.

Gikahinumduman nga karong bag-o upat ka bomba ug usa ka land mine ang napalgan sa tersiro distrito, usa niini sa barangay Compra sa lungsod sa Liloy diin, kini nakabuto samtang nakabuto usab ang usa sa tulo ka bomba nga gitanom didto sa lungsod sa Sibuco. Gikahibaloan nga malampuson usab ang gihimong proclaimation rally sa APP-KAMPI sa lungsod sa Leon Postigo ug Labason nga gisaksihan sa liboan ka mga katawhan nga solidong mosuporta sa mga kandidato sa APP-KAMPI karong pinili-ay sa Mayo 14 ning tuiga. (The New Nandau, Vol. XVI No.42)

*

Mat Ranillo andam mosuporta  sa Youth Enhancement Support Program

Andam musuporta si Mat Ranillo III ang opisyal nga kandidato sa partidong APP/KAMPI sa pagka konggresista sa segundo distrito ning lalawigan sa programang Youth Enhancement Support kun YES nga gipatuman karon ni Governor Rolando Yebes alang sa mga kabataan.

Matud pa ni Ranillo nga kung siya buligan sa katawhan karong umaabot piniliay, iyang gahinan ug 3 milyones ka pesos ang programa sa mga kabataan ning lalawigan ilabi na sa segundo distrito aron matutokan ug magiyahan ang mga kabatan-onan diha na sa pagpalambo sa ilang mga talento, pag-agak kanila aron makakat-on ug saktong edukasyon ug apil niini ang pakiglambigit kanila sa natad sa sports.

Sa pakighinabi sa Zamboanga del Norte United Correspondents kang Ranillo nga andam siya nga motabang sa kagamhanang probinsyal sa nasugdan na nga programa sa mga kabataan. Gihatagan usab ug dakong tahas karon ni Ranillo ang iyang anak nga babaye nga si Krista Ranillo nga maoy mamahimong Provincial Coordinator aron maoy mo representar sa Zanorte didto sa National Youth Commission tungod kay mas naila na usab ang iyang anak sa Show Business ug daghan usab kini ug koneksiyon didto sa kauluhang Manila.

Ang YES program ang gipaluyuhan usab kini sa Community Development Assistance Unit kun CDAU nga diin padayon kining mihimo ug final validation sa mga miembro niini. (The Buddz, Mindanao Star, Vol.III No.11)

*

Belen vs. Matoy
NECK TO NECK

Usa ka neck to neck ang bugnong lugaynon nila ni Mrs. Evelyn Uy batok kang Kongresista Roseller Barinaga sa posisyon nga pagka Mayor ning dakbayan sa Dipolog. Mao kini ang nakonpirmar sa nagkalin-laing survey nga gihimo sa nagka lain-aling agencia ning dakbayan.

Kahinumduman nga pag-sugod ug lusad sa kandi-datura ni Matoy Barinaga, nangatin siya pag-ayo kay lig-on ang makinarya sa Lakas-CMD sa pamilyang Uy ning dakbayan.  Ang ‘ratio’ niadtong tungora 60-40 pabor ni Evelyn Uy. Apan nagkahinayhinay ug tumpag ang kamada human si Barangay kapitan Berto Flores sa Dicayas mibiya sa maong grupo ug mitapon sa grupo ni Barinaga ug milan-sar pa gayod pagka konsehal ning dakbayan sa bando ni Barinaga.

Ang gikatahong pagba-litok ni Barangay Captain Bartolome Bastasa nga usa ka lig-ong lider ni Uy sa Galas ngadto kang Barinaga wala hinuon mahinayon apan si Kapitan Bastasa nagpakita sa iyang kabugnaw nga motabanga ni Belen Uy human siya wala maapil sa linya sa partido pagka konsehal. Si Brgy Kapitan Papon sa Diwan gikatahong hugta-nong magpabilin ni Mayor Berto uy sa pagka gover-nador apan siging makigkita ni Barinaga sa pinuy-anan niini dinhi sa dakbayan.

Ang pagluwat ug pulong ni Engr. Franklin Acao Lim usa usab ka suod nga ig-agaw sa pamilyang Uy nga siya mosuporta sa grupo ni yebes ug Barinaga maoy dugang makatay-og sa maong kamada. Sumala sa survey, si Belen Uy maodaug sa Barangay Miputak, Santa Isabel, Santa Filomena, Galas, Olingan, Sangkol, Cogon, Diwan, Gulayon ug Sinaman.

Si Barinaga usab modaug ug daku sa Barangay Central tungod sa suporta sa mga negosyante. Ang ubang barangay nga balwarte ni Barinaga mao ang Barra, Biasong, Estaka, Dicayas, Minaog, Sicayab, Lugdungan, Turno, San Jose ug Punta. Hinuon sa maong survey si Mayor Berto Uy nagpakita gihapon ug abante kontra ni Gov. Lando Yebes ning dakbayan nga mokabat sa 3,000 botos. (Press Freedom, Vol. XIX No. 30)

*

Gipasalig karon ni Regional Director Police Chief Superintendent Jaime Garcia Caringal nga himoon nila ang ilang “utmost best” aron pagmintinar sa usa ka matinud-anon, hapsay ug malinawong Mayo 14 nga eleksiyon. Mao kini ang pasalig nga gipaabot ni PNP Regional Director Caringal atol sa bag-ohay lang nga nahuman nga konsultasyon ug pirmahay sa peace covenant sa mga hingtungdang kandidato ning dakbayan sa Dipolog.

Kahibaloan nga gipangunahan sa Dipolog PNP ang pagpahigayon sa usa ka konsultasyon sa actual nga peace and order situation sa Dipolog atol sa pagsulod sa election period karong tuiga dinhi sa dakbayan ug ang pagpahigayon sa pirmahay sa usa ka peace covenant nga gipangunahan sa City COMELEC tali sa mga kandidato, sa PNP ug sa COMELEC mismo nga maoy magsilbing commitment sa tagsa-tagsa ka mga kandidato aron makab-ot ang usa ka matinud-anon, hapsay ug malinawon nga eleksiyon. Gipasabot usab ni PNP Regional Director Caringal nga ang pagmintinar sa hapsay, malinaw ug matinud-anong eleksyon dili lang trabaho sa mga otoridad sa PNP kun dili sa tanang stakeholders sa komunidad ilabi na sa mga kandidato ug mga botante.

Dugang gipaklaro ni Caringal nga usa lang sa major factor ang kontribusyon nga serbisyo sa mga PNP personnel tungod kay sila mao gayud ang giila nga peace keeping authorities. Ang nasangpit nga kalihokan natapos nga han-ay ug gibulok kini sa usa ka courtesy call nga gipahigayon ni PNP Director Caringal ngadto kang Mayor Roberto Y. Uy. (Dipolog CIO Press Release, Dipolog Chronicle, Vol.VI No.43)

*

Estado sa nutrisyon dinhi gisusi na usab

Gipahigayon dinhi sa Dipolog ang ikaduhang validation visit pinaagi sa hut-ong gikan sa National Evaluator’s Team (NET) sa National Nutrition Council sa kaulohang Manila, sugod niadtong Miyerkules, Abril 18 hangtud karong Domingo, Abril 22. Sumala sa buhatan sa City Nutrition Division, ang tuyo ning maong validation visit nga gipangulohan ni Executive Director Bernardita P. Flores mao ang tinuig nga pagsusi sa padayong pagpatuman sa mga  programa sa nutrisyon sa mga kabaranggayan sa dakbayan.

Kahinumduman nga ang Dipolog, gawas sa probinsiya nga giila karong pinakakabus sa pagkaon o food poorest sa tibuok nasud, mananaog sunod-sunod sa makadaghang katuigan nga regional awardee sa Green Banner nga nagpaila nga ang programa sa nutrisyon sa dakbayan hawod sa tibuok Zamboanga Peninsula mao ang Dipolog nahimong national CROWN (consistent regional overall winner in nutrition) Awardee karon ubos sa pagdumala ni Mayor Roberto Yu Uy. Lakip sa pagasusihon mao ang tanang mga records sa nahisgotang buhatan aron sa paglantaw sa nahimo niining mga accomplishments alang sa tuig 2006, nga magapakita sa matunhayong pagpatuman sa mga programa sa nutrisyon sama sa mga nagkalain-laing livelihood projects, supplemental feedings,  micro nutrients supplementation, maternal child health care ug daghanan pa.

Dugang pang gisusi kon sa pagkasunod tuig padayon pa bang gipatuman ug gisustinihan sa kagamhanang lokal ning dakbayan pinaagi sa City Nutrition Division ang tanang mga programa sa nutrisyon isip “CROWN Awardee.” Lakip sa gibisitahan sa NET mao ang lima ka mga barangay dinhi sa dakbayan nga mao ang Galas, nga mao karon ang kasamtangang nahimutangan sa nahimong Barangay Nutrition Scholar sa milabay nga tuig nga si Marietta Carcallas. (Dipolog CIO Press Release, Dipolog Chronicle, Vol.VI No.43)

Tubag ni Berto sa disqualification case Pulos xerox copies

Pulos ra ordinaryong Xerox copies ang gisumitir ni Mayor Roberto Uy sa iyang giduso nga tubag ngadto sa Commission on Elections kabahin sa kasong disqualification nga gipasaka ni Mr. Abbey Canturias sa isyu nga ang mayor hangtud karon nagapabiling usa ka lunsay nga langyaw sigun sa gipakita sa iyang birth records gikan sa Rizal, Zamboanga del Norte.

Kini ang gitataw ni Atty. Cresencio Palpagan, Jr. ang abogado ni Canturias sa iyang gisumitir nga position paper human miduso sa iyang tubag si Mayor Uy atubangan sa COMELEC. Giklaro ni Palpagan sa gisumitir niyang position paper nga sa tanan nilang gipataban nga mga dokumento ug ebedensiya kini pulos original certified Xerox copies.

Samtang sa tubag ni Mayor Uy ang mga dokumento nga gipataban sa ilang tubag pulos ra plain Xerox copies o unverified. Nakabutang pa sa verification sa tubag sa mayor pinaagi sa iyang abogado nga si Atty. Kenneth Rosal nga ang verification na subscribed ug gipanumpaan ni Mayor Roberto Uy atubangan sa Notary Public niadtong Enero 18, 2007 sa lungsod sa Tampilisan, Zamboanga del Norte.

Matud pa ni Palpagan nga mas nauna pa ang verification ni Mayor Uy pinaagi sa iyang abogado nga si Rosal kay sa pagpasaka nila sa kaso kay ang disqualification case gipasaka ni Canturias niadto pang Abril 2, 2007 diin ang mayor gipadalhan ug summons niadtong Abril 10, 2007. Sumala pa ni Palpagan kini maoy usa sa bikil sa tubag sa mayor nga ilang nakita ug ang pinaka bug-at niini nga ang gisumitir nga tubag nila dili verified busa nahulog nga kini usa lamang ka yanung papel.

Sukwahi sa giluwatang pahayag sa asawa sa mayor sa interview sa radio nga ang isyu kabahin sa citizenship ni Berto dugay rang naresolbar niadto pang tuig 1998, sa ilang giduso nga tubag ngadto sa COMELEC walay gipataban nga kopya sa resolution gikan sa korte o kaha sa komisyon nga nagpama-tuod nga siya usa ka naturalized citizen. Si Atty. Palpagan midugang sa pagpadas-og sa gisumitir nilang position paper nga sa nahipos nilang records gikan sa Voters Registration Records ni Roberto Uy ug sa mga certificate of candidacies nga iyang giduso panahon sa iyang paglansar pagka mayor sa Dipolog nagpakita nga wala magkaparehas ang iyang gibutang nga citizenship.

Sa COC nga nadawat sa COMELEC sa iyang paglansar pagka mayor sa Dipolog sa eleksiyon sa Mayo 14, 2001 iyang ipanumpaan nga usa siya ka naturalized Filipino citizen. Samtang kopya sa iyang COC para sa iyang paglansar pagka mayor niadtong Mayo 10, 2004 si Mayor Uy nanumpa na usab nga siya usa ka Natural Born Filipino.

Gituki usab ni Atty. Palpagan sa gisumitir nilang position paper ang gihimong pagsuway ni Berto pinaagi sa iyang abogado nga si Rosal ang pag-ilad unta sa municipal civil registrar sa Rizal, Zamboanga del Norte nga papirmahon sa usa ka gipalsipikar nga dokumento nga birth certificate sa mayor. (Press Freedom, Vol. XIX No. 28)

*

Dipolog nagkinahanglan ug Sewerage Treatment Plant

Gihagit karon sa kataw-hang Dipolognon ang kagamhanang lokal niini nga maoy unahon sa pagkonstrak ang usa ka sewerage treatment plant kay sa mangu-tang na usab kini ug kapin sa P100m para sa pagsumpay sa Dipolog Boulevard.

Kini karon ang gipalanog sa pipila ka sektor sa dakbayan sa Dipolog kinsa nakamatikod nga ang gipadas-og nga mga pro-yekto sa city hall wala maglantaw sa umaabot nga panahon nga maoy labing kinahanglanon. Sumala pa nila kini karon ang labing kinahanglanon sa siyudad sa Dipolog atuba-ngan sa nagtubo niining populasyon diin hangtud karon ang hugaw sa siyudad ilabi na sa drainage canal niini derecho ra nga gipa-awas sa dagat nga maoy nakatampo karon sa polusyon sa atong kadagatan diin nagagikan usab ang tinubdan sa pagkaun sa atong mga katawhan.

Alang kanila kon mangutang man ang siyudad sa Dipolog ug laing P170 milyones ka pesos para sa phase II sa boulevard mas labing mahinungdanon nga gamiton ang maong kantidad sa pagkonstrak ug sewerage treatment plant kay kini ang labing mas mahinungdanon nga paga kinahanglanon sa atong mga karon ug sa umaabot nga mga panahon. Matud pa sa mga lungsuranon kon ang giapas karon sa kasamtangang administrasyon mao ang pagkahalin sa semento ug kabilya sa mga negosyo sa pamilya sa mayor ang pagpatindog ug sewerage treatment plant labaw na nga nagkinahanglan niini gikan sa pagkonstrak sa gikinahanglang line drainage ug sa planta mismo.

Sa ilang nakita ang pagkonstrak ug dugang sa boulevard usa ka pag-usik-usik sa pundo sa katawhan kay walay ikatabang para pagpalambo sa kahimtang sa siyudad ang nasangpit nga inprastraktura gawas sa pagpaanyag labaw sa tanan walay mapaabot nga income ang siyudad niini. Sa ilang gipalanog nga kabalaka kon ang Dipolog dili molihok niini moabot ra ang panahon nga maunay kini sa iyang kaugalingong hugaw nga maoy makamugna sa polusyon sa atong tinubdan sa tubig mainom nga gikan sa deep well ug sa mga pagkaun gikan sa dagat.

Nalipay sila sa ilang nakita sa kalimpyo sa kadalanan sulod sa poblacion sa Dipolog, apan dili lang unta diha kutob ang kadasig sa atong mga opisyales karon sa dakbayan kay kini usa lamang sa  aspeto sa pagbatun ug limpyo nga environment sa palibot. Sama sa ubang mga siyudad nga nagbatun na ug ilang kaugalingong sewerage treatment plant kini nahimong usa sa ilang economic enterprise.

Sa nasayran ang Dipolog mogastu ug kapin sa P170 milyones ka pesos para sa pagkonstrak sa phase II sa boulevard ug sa gihapon kini utangon gikan sa LOGOFIND sa World Bank. Sumala pa maoy gipresentar sa Dipolog nga baybayon sa Central Barangay ug Miputak kanunay nga maigo sa kalamidad busa gikinahanglan ang pagpahimutang niini sa foreshore protection. Ang loan nga ilugway sadili gayud para sa pagkonstrak sa boulevard kon dili sa foreshore protection nga maoy ang seawall diin ang siyudad na sa Dipolog maoy mogastu para sa pagkonstrak sa boulevard.

Para aprubahan ilang loan sa LOGOFIND nangayo ang Dipolog ug pabor sa Provincial Disaster Coordinating Council sa Zamboanga del Norte nga ipa deklarar ang kabaybayonan sa Central Barangay ug Miputak nga disaster prone area. Sa nasayran ang nasangpit nga hangyo nga gidasonan sa PDCC aron maakomodar ang gipamarayeg sa Dipolog kay maoy ilang gisuporta sa pagpangutang. (Press Freedom, Vol. XIX No. 28

*

1ST ZANORTE BUKLOG FESTIVAL MALAMPUSON

Malampusong napahigayon ang  ZaNorte Buklog Festival kaniadtong April 16-20,2007 sa barangay Mandih, Sindangan ning lalawigan nga gitambungan mismo ni Gov. Rolando E. Yebes ug sa mga kadagkuan sa kagamhanang probinsyal, ingon man ang mga opisyales sa lungsod sa Sindangan pinanguluhan ni Mayor Bert Macias, mga timoays ug Subanen Community. Atol sa pagbukas sa unang adlaw sa Buklog Festival ’07, si Atty. Patrick Ivan Ang ang Provincial Tourism designate, kinsa mi-representar ni Gov,. Rolando E. Yebes, kini namahayag nga dili lamang karon pagahimoon ang Buklog sa ZaNorte kondili ipadayon kini hangtod sa pipila ka mga katuigan aron sa paghatag og pagtagad sa mga kaigsoonang Subanen.

Sa ikaduhang adlaw sa pagsaulog sa Buklog Festival April 17 gihimo ang Little Buklog ug pagka April 18 ang Big Buklog nausab diin, kini gilangkuban sa pagsayaw-sayaw sa mga sa mga Subanen pinanguluhan sa ilang mga baylan, pagka-April 19 adunay Subanen song and dance competition. Gipasabot sa mga kadagkuan sa Subanen nga sa tuig 1920 ngadto na sa 1930, ang Buklog nahimong traditional ritual nga gipasiugdahan sa mga katiguwangang Subanen dinhi sa probinsiya. Ang buklog ang inila kini sa mga Subanen nga sagrado isip pagtawag o ritual, tradisyon nga adunay tulo ka tumong. Ang buklog gihimo isip pangamu o panghangyo diin, nagsapot ang tanang Subanen kinsa ilang pangandoy mamahimong magmalampuson o matinuod ang pagpakita sa ilang saad nga ilang gihimo ug ang paghalad sa ilang intension atoll sa buklog.

Ang buklog ipahigayon usab isip samaya kon pasaad nga naghalad og pasalamat alang sa mga bata nga gikan nagdaut ug naayo na. Gihimo usab ang buklog alang sa palunto kon mass death anniversary, kini alang sa ilang mga minahal sa kinabuhi nga mitaliwan na aron mahimutang ang ilang kalag kaysa sa nag-utaw-utaw lamang sa panganod hangtod sa hangtod. Sa samang bahin, atol sa katapusang gabii sa pagsaulog sa 1st ZaNorte Buklog Festival ’07, usa ka enthronement ang nahitabo nila ni Governor Rolando E. Yebes, Congressman Cesar Jalosjos isip mga Timuay Labi ug ni Mrs. Marivic Samios Uy Carpitanos isip Bai kon prinsesa gumikan kay aduna silay dugong Subanen. Si Gov.Yebes mapasigarbuhong namahayag human kini makoronahe nga siya may dugong Subanen nga nagalatay sa iyang kaugatan maoy hinungdan nga di usab niya mahikalimtan ang Subanen diin, gigahinan gayod sa amahan ning probinsya og kantidad ang maong kasaulogan sa tribong Subanen. Suma pa sa gobernador nga angayan gayod nga di hikalimtan ug angayang respetuhan ang mga Subanen ug nga dili angayang ikaulaw ang pagka-Subanen. Samtang si Cong. Cesar Jalosjos human ma-koronahe pagka Timuay Labi misaad nga sunod tuig sa pagsaulog sa Buklog Festival aduna na’y kantidad nga itagana ang congressman isip pagsuporta unya sa maong kasaulogan.

Subay niini, dako kaayo ang pasalamat sa mga tribong Subanen ngadto nila ni Gov. Yebes, Cong.Jalosjos, Mayor Bert Macias sa Sindangan ug sa tanang mga personahe sa probinsya nga misuporta gayod sa ilang kalihukan. (Mindanao Star, Vol.III No.13)

*

Chief of Police Macapaz gireklamo kay nanumbag ug sibilyan

Kusganon nga gireklamo karon ang hepe sa Dipolog PNP nga si Police Chief Inspector Romeo Juan Macapaz human manumbag ug sibilyan kaniadtong Abril 17 sa gabii.

Usa ka Joel Evangelista ang nagmaneho kini ug sakyanan nga military type jeep nga iyaa sa kagamhanang probinsyal sa Zamboanga del Norte ang gipara ug mihunong sa gipahimutang nga check point sa kapolisan dapit sa may rotunda kagabii. Ang driver nga si Evangelista ang gipangitaan kini ug rehistro sa sakyanan sa mga polis, usa sa misita kaniya mao si Macapaz nga nagsibilyan attire. Ang maong driver ang mipasabot kini sa polis nga wala pay rehistro ang gimaneho niyang sakyanan sa probinsya gumikan kay bag-o pa kini. Dali nga giilog sa usa ka polis ang yabe sa maong sakyanan ug mimando ngadto kaniya nga ipalugar una ang sakyanan. Human niini gibunlot ang driver nga si Evangelista ug matod pa gisumbag ni Macapaz.

Si Evangelista ang naigo kini sa kinumo ni Macapaz sa makaduha ka higayon sa iyang wala nga bahin sa iyang bukton ug wala nga bahin sa lawas sa biktima. Human niini ang biktima ang gipasakay ni Macapaz sa iyang maanindot nga patrol car hilux plate # SHJ 286 ug gidala ngadto sa police station.

Ang nakapahimulos karon, nga imbes ang hepe sa kapolisan nga si Macapaz maoy nanumbag, ang biktima na hinoon ang gibalhog sa selda sa Dipolog PNP station gumikan lamang sa kalapasan nga wala kini makapakita ug rehistro sa sakyanan. Sa kabahin ni Chief of Police Macapaz iyang gipasabot nga ang iyang gihimong pagsikop kang Evangelista kini subay na sa pagpatuman sa “No plate, no travel policy” nga diin ang maong sakyanan sa probinsya ang wala kini plate number. Ang maong pagpasabot ni Macapaz usa ka dakong tamparos ngadto kaniya gumikan kay mismo ang mga sakyanan sa kapolisan walay plate number ilabi na ang Tamaraw FX color pula.

Saksi ang kapitan sa barangay Cape sa lungsod sa Roxas nga si Perpetua Montemayor sa gihimong pagpanumbag ni Macapaz ngadto kang Evangelista gumikan kay sakay niadtong higayona ang naasoyng kapitan. Sa laing bahin, “Dili unta angayan nga prisohon” kini maoy pagpaklaro ni Police Regional Director Jaime Caringal, subay sa gihimo ni Police Chief Inspector Romeo Juan Macapaz, chief of Police sa Dipolog, nga tungod lamang sa kalapasan nga walay plaka ang sakyanan sa probinsya, ang driver niini nga si Evangelista ang gibalhog ngadto sa selda gawas sa gisumbag.

Ang reaction ni RD Caringal, ang iyang gipabati atol sa gihimong signing sa peace covenant sa hawanan sa konseho sa Sangguniang Panlungsod dinhi sa Dipolog, alang kang RD Caringal nga kung ang kabahin sa “No Plate, No Travel Policy” ang violation dili unta angayang prisohon ang driver. Masaligon ang Regional Director nga iyang himoan kini ug dugang panginsusi ug iya na kining itugyan ngadto kang Police Provincial Director Yanga aron sa pagsuta kung unsa ang tinuod nga hitabo. (The New Nandau, Vol. XVI No.42)

*

Gibutyag ni Bokal Dodong Bolando nga adunay mga rally sa Lakas nga gamay lamang ang mga tawong naminaw ug usahay walay mga tawong nanambong sa mga rally niini.

Atol sa peace covenant didto sa lungsod sa Liloy, kompleto ang mga kandidato sa APP-KAMPI nga naglangkob nila ni Gov. Rolando E. Yebes, Cong. Cesar Jalosjos, upat ka mga bokal nga sila si Board Member Bolando, Jojo Ajero, Sitoy Darunday ug Bong Eding lakip na ni mayoralty candidate Bechu Uy ug iyang bise mayor ug mga kandidato sa Sanguniang Bayan ug bugtong si Vice Gov. Baby Olvis lamang ang wala makatambong tungod kay adunay kini’y opisyal nga lakaw sa kaulohang Manila.

Sa partido Lakas si Noble lamang uban sa usa ka kandidato pagka-bokal sa 3rd district, kandidato sa pagkabise mayor sa Liloy ug mga kandidato sa Sanguniang Bayan, samtang wala mopatim-aw si Mayor Berto Uy sa Dipolog ug ang ilang kandidato pagkamayor sa lungsod sa Liloy nga si Shobing Lim ug uban pang kandidato pagka-bokal. Human sa pagpirma sa nahisgutang peace covenant tali sa APP-KAMPI ug LAKAS ang mga pili-onon pulos mipalanog nga andam silang motuman sa ilang gikasabutan nga ipatigbabaw ang kalinaw niining nagsingabot nga piniliay. Gipaklaro usab ni Noble nga andam siyang mosunod sa maong peace covenant kay siya nagtoo nga usa ka balaang katungod sa mga katawhan ang pagpili sa ilang kandidato.

Gikahinumduman nga karong bag-o upat ka bomba ug usa ka land mine ang napalgan sa tersiro distrito, usa niini sa barangay Compra sa lungsod sa Liloy diin, kini nakabuto samtang nakabuto usab ang usa sa tulo ka bomba nga gitanom didto sa lungsod sa Sibuco. Gikahibaloan nga malampuson usab ang gihimong proclaimation rally sa APP-KAMPI sa lungsod sa Leon Postigo ug Labason nga gisaksihan sa liboan ka mga katawhan nga solidong mosuporta sa mga kandidato sa APP-KAMPI karong pinili-ay sa Mayo 14 ning tuiga. (Mindanao Star, Vol.III No.13)

Kasong disqualification batok Belen Uy
namatud-ang bikil ang Filipino citizenship

Human sa makuting pagduki-duki ug pamatud-I kagahapon sa bando ni Kongresista Roseller “Matoy” Barinaga nga daghang bikil ang Filipino Citizenship naturalization documents ni magpapatigayon Evelyn Tang Uy, giandam ang laing lig-on nga disqualification petition ngadto sa Commission on Elections.

Gipaabot nga modangat balik dinhi sa dakbayan ang legal team nga mituyo pagbiyahe ngadto sa lungsod sa Labo sa Sorsogon ug Camarines Norte aron utingkayon ang mga dokumentos sa pagkatawo ni Ginang Uy. Susamang kaso sa disqualification ang gisang-at sa miaging adlaw batok kang Mayor Berto Uy basi sa mga dokumento nga nagpakita nga dili siya tunay bansagon og UY kau iyang amahan mao man si CHUA GO.

Kon dasunan sa Comelec ang nasangpit nga disqualification petition sulod sa reglamentary period nga 20 ka adlaw, kawad-an sa legalidad anng kandidatura ni Uy pagkamayor ug dili na unya iphon ang iyang boto sa umaabot nga piniliay. Apil nga na-apektuhan sa disqualification petition mao ang mga kabtangan sa magtiayong Uy nga mobalor og P486 Milyones, ingon man mga deposit accounts niini sa lain-laing bangko nga mobalor og P96 Milyones.

Lakip sa ma-apektuhan mao ang yuta ug uban pang kabtangan nga gipamalit sa pamilya Uy sanglit molutaw man nga dili sila tinud-anay nga Filipino citizen. Walay nakit-ang papeles nga nagmatuod nga kini si CHUA GO UG ISAIAS UY usa ra ug bana sa usa ka laing langyaw kanhi nga si Francesca Yu. Ang original birth certificate ni Uy sa tuig 1952, ingon man ang mga magsuon nga sila si Kim Po, Pidoy, Henry, William ug laing duha pa, nagmatuod nga ilang inahan apelyido’g YU apan ang ilang amahan mao ang usa ka CHUA GO.

Mga dokumento gikan sa Bureau of Immigration and Deportation kon BID nagpakita nga iyang amahan mao si CHUA GO sa dihang nanumpa siya pagka naturalized Filipino citizen didto sa Manila sa tuig 1973. Dunay mga dokumento nga nagpakita nga sa tuig 1975 ang iyang amahan si ISAIAS UY na. Walay nakitang dokumento nga giusab ni Chua Go ang iyang pangalan ngadto sa pagka Isaias Uy.

Ubos sa Omnibus Election Code ug sa ubang balaud, ang mga langyaw”disqualified”nga mokandidato pagka opisyal sa kagamhanan ug mohupot ug katungdanan sa panerbisyo, ug way katungod nga mamalit ug yuta ug kabtangan dinhi sa Pilipinas. (Mindanao Star, Vol.III No.11)

Credits: Dipolog Chronicle is published every Saturday and its Editorial Office is located at 059 Lacaya St., Dipolog and can be reached through the following Tel. No.: 212-2255

*

HULAGWAYBALITA:
 

Mokabat sa P11-M Beach Walk sa Sunset Boulevard dul-an nang matapos

Dul-an nang matapos ang pagtrabaho sa 3.5 meter wide Beach Walk nga nagpalibot sa Sunset Boulevard dakbayan sa Dapitan nga nagkantidad sa 11 milyones pesos. Kini maoy gipamahayag ni engr. evelyn Engineer II Construction Division sa dihang nahinabi human nakitang hapit na ang kahumanan sa maong proyekto nga gipahimutang sa New Dapitan.

Gisugdan ang maong proyekto sa Crisostomo Ibarra Street sa Barangay Dawo, Sunset Boulevard padulong sa utlanan sa Polo ug kini hingpit na unyang masuroyan sa mga katawhan panahon sa ilang pag-ehersisyo sa sayong buntag o pagsalop sa adlaw nga ang kabaybayonan sa Sunset Boulevard maoy usa sa nindot nga lugar nga masud-ongan niini.

Bugtong gilihok na lamang sa City Engineering Office mao ang padulong sa Polo nga adunay kantidad sa 4 milyones pesos gikan sa 11 milyones nga kinatibukang project cost. Ang beach walk maoy makahatag unya ug dugang maanindot nga talan-awon sa dakbayan nga gipaningkamutan sa administrasyon ni Mayor Diminador G. Jalosjos, Jr nga mapatuman alang sa kalambuan sa turismo. (Mindanao Star, Vol.III No.11)

*

Pulso Sa Katilingban
Cicer M. Binghay
“Kini dili malalis”

Gitagna daan niining Pulso sa Katilingban, nga human sa piniliay karong Mayo 14, 2007 , si Manny Pacquiao world champion sa iyang timbang ug ranggo modaog pagka kongresista. It is another astonishing record breaking nga iyang ngalan mahatala sa GUINESS WORLD RECORD pagka CHAMPION BOXER NGA KONGRESISTA. Mahitabo pa kon human mapili pagka kongresista unya makaaway sa gitakdang return bout niya kang Antonio Barrera, ang Emcee o tig paila sa manag-away, mapugos pag-ingon: “In this corner… Hon. Manny Pacquiao, congressman of the Philippines –vs- Antonio Barrera of Mexico. Kini dili malalis.

Nahitabo na gyod, nga ang mayoriya sa katawhan sa dakbayan sa Dapitan ug Dipolog o sa primero, Segundo ug tersiro distrito sa lalawigan NAKATUGKAD, that this election is crucial. A decisive challenge or a critical moment of our lives. Tanan naninguha pag kopras sa salapi sa mga kandidato nga magpapili gumikan sa ilang salapi. Dili alang sa tingusbawan sa pag-alagad. Gisumban, gihimong panag-ingnan sa taga Zamboanga del Norte nga kon ipadayon nila ang gipakitang pamunoan ni City Mayor Berto Uy sulod sa siyam ka tuig nga gi-unay’g pangurakot ang salapi sa dakbayan, wala nay kapaingnan nga dunay kaugmaonm ilang mga kabataan nga makakaplag pamunoan nga  husay gitumong for public service and interest.

Mao nga nangimbisog karon pag guba sa salapi politika negosyo, dili lamang ang mga opisyales ug kawani nga gilisod-lisod sa City Hall nga tinudlo ni Matoy Barinaga. Miapil daghang mga namatigayon ginagmay ug dinagko pagkampanya batok salapi politika. Ultimong nagmaneho sa motorcab ug sikad naningkamot. Kini sila nahitabo nga mga motorcab ug sikad paundangon. Ang mayoriya nga mga but-an botantis, nahadlok nga kon mapili pag usab kining kandidato nga salapi ang awayan, malisod sa sunod tumbahon. Ilang gipaninguha nga niining botasyon sa Mayo 14,2007 mao ang katapusang higayon nga mapukan nila ang pagduyog sa tinagingting sa salapi sa maong mga kandidato.

Ang labing tinuod..kon mapukan dinhi si Evelyn Uy  pagka mayor sa dakbayan ug Berto Uy pagka gobernador sa lalawigan, kini sila dili na makabangon…ug mosugod na dinhi sa lalawigan magpakita ang tukma, husto nga mga  kwalipikasyones mga kandidato nga nagtumong pagka opisyal sa kagamhanan. Kon mapukan ang magtiayon nga mga Uy, mawala na ang graft and corruption sa City Hall nga nabisto sa taga City Auditor ubos ni Manuel Urquiaga.  Mawala na ang administrator, doctor-doktor, engineer-engineer, ug karon City Budget Officer nga si Rommy Reyes ang Jack of all Trades hatchet man ni Berto Uy. Wala nay daug-daugong opisyales ug kawani sa City Hall. Mawala ang hardware-hardware nga upat ka buok ni Berto Uy. Makaapil na intawon dinhi ang mga hardware proprietor nga sulod sa siyam ka mga tuig gihikawan makatilaw sa pamaliton nga mga construction materials ug office supplies sa kagamhanan. Tal mawala usab ang mga polis-polis mga body guards nga gisweldohan sa calamity funds sa kagamhanan..ug  daghan pa uyamot nga paggamit sa mga driber, mekaniko ug operator sa Public Works sa dakbayan sa personal nga kalihokan sa personal negosyo.

Malarawan usab karon sa katawhan nga mahibalik sa dakbayan sa Dipolog ang serbisyo nga inubanan sa pagbati nga paga ubanan kanunay nga mga katawhan, dunay partisipasyones sa kalihukan lungsodnon. Dayon magpabilin ang bugtong tema ni Gov. Lando Yebes nga Una sa tanan ang katawhan. Magpermaninti nga dili maparog ang iyang unique & original LANDO BIBO nga gihatagan dako nga pag dayeg sa tibuok nasod. Magpabilin ang gipangandoy sa katawhan nga  serbisyo social..ilabi na sa health program ug tinud-anay nga livelihood alang sa tanang matang ug hut-ong sa katawhan nga walay pabor-pabor.

Musilak balik ang Galas Satellite Market ug ang pag uswag sa dakbayan mag-awas diha sa kabarangayan sa Galas, Sta. Filomena, Olingan uban pa… pagbalik ni Diego Salvador. (Press Freedom, Vol. XIX No. 30)

Kandidatura ni Nick Carbonel suportado sa mga religious groups

Nagkahugpong karon ang mga nagkalain-laing mga relihiyon didto sa lungsod sa Roxas ning lalawigan sa kandidatora sa APP/KAMPI pinanguluhan ni mayoralty candidate Hon. Nick Carbonel ug mga kauban niini. Nasayran sa Zamboanga del Norte United Correspondents (ZNUC) nga ang Seventhday Adventist, Alliance Church, Born Again Church ug Roman Catholic ang hugtanon kining mosuporta sa bag-o nga nilansar pagka-mayor nga si Carbonel tungod sa ilang nahiaguman sa kasamtangang administrasyon ni Mayor Calito Feras.

Matud pa sa maong religious groups, panahon na nga magbag-o ang lungsod ug mayor human napasagdan kini sa dugay na nga panahon nga ang lungsod nagpabiling walay asenso o kalamboan. Kahinumduman nga apektado usab karon sa krisis ang mga casual employees sa maong lungsod, nga diin tag tulo na ka bulan nga walay sweldo sweldo.

Bag-uhay pa lamgn, nasayran gikan ni Mr. Titoy Aseniero kandidato pagka-bise mayor nga nahunong na usab ang operasyon karon sa milk processing sa barangay Irasan tungod kay wala kini makabayad sa ilang mga utang didto sa Cebu nga maoy nag-supply kanila sa ubang mga ingredients sa maong mga planta. Matud pa ni Carbonel, nga ang ilang grupo karon maoy kawsa sa pagpabarog sa bag-ong Roxas nga napasagdan sa namunuan niini nga si Mayor Feras. (The Buddz, Mindanao Star, Vol.III No.13)

Mag-uuma buhong na unya panahon Barinaga
ug Yebes ang magdala sa renda sa Dakbayan sa Dipolog

Hayan mabuhong na unya ang dugay ng uhaw nga mga mag-uuma ning dakbayan sa Dipolog gumikan kay usa sa hatagan ug prayoridad nila ni pili-onon pagka Mayor Matoy Barinaga ug Bise Mayor Ed Yebes ang paghatag ug kaayohan sa mga mag-uuma, usa na niini mao ang programang patubig nga magsubay sa mga dagkong kanal ug kasapaan sulod ning dakbayan.

Angayang kahibaloan nga karong panahona wala na nahatagi ug pagtagad ang mga programang pang-Agrikultura sa dakbayan gumikan kay programa lamang pang-inprastraktura ang gilantaw ug gihatagan ug dakong pagtagad sa kasamtangang namunuan ning syudad. Gumikan sa maong hita-bo nag-nga-nga na karon ang kadaghanan sa mga mag-uuma ning dakbayan tungod kay gamay na lamang ang abot niini panahon sa ting-ani agi sa hulaw nga natagamtaman niini diha sa ilang tagsa tagsa ka umahan.

Gusto nila ni Barinaga ug Yebes nga abunda ang abot sa matag mag-uuma sa Dipolog tungod kay ang mga mag-uuma importante ug partner kini diha sa pagkab-ot sa kalambuan sa usa ka komunidad ug niini mga programang patubig, pahu-lam sa puhunan ug abono ang planong himoon sa mga farmer-friendly nga mga kandidato. Gipahayag usab ni pili-onon pagka-bise Mayor Ed Yebes nga nabati niya ang kawad-on karon sa mga mag-uuma sa dakbayan gu-mikan kay usa man usab siya sa nahimong biktima niini.

Kahibaloan nga si pili-onon pagka-Mayor Matoy Barinaga ang aduna na kini gipahat karon nga kapin 7 milyones ka pesos alang sa pagpatuman sa programang patubig dinhi sa dakbayan, ang maong kwarta ang nagagikan kini sa cong-ressional fund ni Cong. Barinaga. Sa pagbalik ni Matoy Barinaga natan-aw na karon sa katawhan nga adunay balanse ang pagpatuman unya sa matag proyekto niini.

Dugang gipabati sa katawhan nga mobalik na usab ang karaang dagway sa hamugaway ug sadya nga Dipolog. (The New Nandau, Vol. XVI No.42)

*

MORE NEWS NGA BINISAYA